تره‌مپ هۆشداریى له‌خوێنڕشتنێكى گه‌وره‌ ده‌دات

سەرۆکی ئەمریکا ڕایگەیاند گفتوگۆ لەگەڵ حەماس بۆ ئازادکردنی بارمتەکان‌و کۆتاییهێنانی بەشەڕی غەززە زۆر ئەرێنی بووەو قۆناغی یەکەمی ئاگربەست ئەم هەفتەیە تەواو دەکرێت.

دۆناڵد ترەمپ سەرۆکی ئەمریکا لەنووسینێکدا لەتۆڕی کۆمەڵایەتیی ترووس سۆشیال ڕایگەیاند، "گفتوگۆیەکی زۆر ئەرێنی لەگەڵ حەماس و وڵاتانی سەرتاسەری جیهان (عەرەب، موسڵمان‌و کەسانی دیکە) لەئارادا بووە بۆ ئازادکردنی بارمتەکان‌و کۆتاییهێنان بەشەڕ لەغەززە، لەئاگربەستیش گرینگتر ئەوەیە دواجار، ئاشتی لەڕۆژهەڵاتی ناوەراستدا دەستەبەر بکرێت".

ترەمپ جەختیشیکردووەتەوە، گفتۆکان زۆر سەرکەوتووبوون‌و بەخێرایی بەڕێوەدەچن.

ئاماژەی بەوەشکردووە، تیمە تەکنیکییەکان دووبارە ڕۆژی دووشەممە لەمیسر کۆدەبنەوە بۆ ئەوەی کار لەسەر وردەکارییە کۆتاییەکان بکەن‌و زیاتر ڕوونی بکەنەوە.

سەرۆکی ئەمریکا دەڵێت:"پێم وتراوە قۆناغی یەکەم دەبێت ئەم هەفتەیە تەواو بکرێت‌و داوا لەهەمووان دەکەم خێراتر بجووڵێن، بەردەوام دەبم لەچاودێریکردنی ئەم ململانێیەی سەدەی پێشوو".

ترەمپ هۆشدارییشیداوە، "کات درەنگەو ئەگەر بەخێرایی ڕێکنەکەون، خوێنڕشتنێکی زۆر گەورە ڕوو دەدات، ئەمەش شتێکە کە کەس نایەوێ بیبینێت".