لە سلێمانى ملیۆنێك كارتى بایۆمێترى دەنگدان وەرگیراوەتەوە

پاش ئەو نەهامەتییە گەورەیەى حكومەتە یەك لەدواى یەكەكانى هەرێم و حزبە دەسەڵاتدارەكانى كوردستان بەسەر خەڵك و دانیشتوانى هەرێمەكەدا هێناویانە، كەچى هاوڵاتییان بە پەرۆشەوە دەیانەوێت لە رۆژى هەڵبژاردن دا روەو سندوقەكانى دەنگدان بچن و سەرلەنوێ دەنگیان پێبدەنەوە.

بەپێى زانیارییەكانى ئیرادە و بە مەبەستى بەشداریكردن لە هەڵبژاردنى داهاتوى عێراق، تا ئێستا زیاتر لە ملیۆنێك دەنگدەر لەسنورى پارێزگاى سلێمانى كارتى بایۆمێترى دەنگدانیان وەرگرتۆتەوەو ژمارەكەش لە كۆى گشتى ژمارەى دەنگدەران نزیك دەبێتەوە.

هەر بە گوێرەى ئەو داتایانەى لەبەردەستى ئیرادە دان، كۆى گشتى ژمارەى ئەو دەنگدەرانەى پرۆسەى بایۆمێترى دەنگدانیان ئەنجامداوە؛ ملیۆنێك و 208 هەزار كەسە و بەراورد بە دانیشتوانى شارەكانى ترى هەرێم؛ لە پارێزگاى سلێمانى زۆرترین كارتى بایۆمێتری لەلایەن هاوڵاتییانەوە وەرگیراوەتەوە.

هاوكات ئامانج عەزیزی، بەڕێوەبەری ئۆفیسی سلێمانی کۆمیسیۆنی باڵای سەربەخۆی هەڵبژاردنەکانی عێراق، لە لێدوانێكى دا ئاماژەى بۆ ئەوەكردوه كە ئەو کەسانەی تازە ناویان تۆمارکردوە یان تۆمارەکەیان نوێکردۆتەوە، دەتوانن سەردانی بنکەکان بکەن بۆ وەرگرتنەوەی کارتەکانیان.