ئه‌مریكا شه‌رع شۆك ده‌كات‌ وفه‌ره‌نساش توركیا سڕ ده‌كات

ناوەندی هەواڵ

ناوه‌ڕۆكى كۆبونه‌وه‌یه‌كى هه‌واڵگریى توركیاو فه‌ره‌نسا له‌ئه‌مریكا ئاشكرابوو.. تێیدا فه‌ره‌نسا هۆشداریده‌دات له‌هه‌ر ده‌ستدرێژییه‌كى ئه‌نكه‌ره‌ بۆسه‌ر ڕۆژئاواى كوردستان.

 دوێنێ ئه‌مریكا هۆشداریى به‌ده‌زگا ئه‌منیه‌كانى سوریادا و ڕایگه‌یاند، ناتوانن هیچ مامه‌ڵه‌یه‌كى سه‌ربازیى‌و هه‌واڵگریى له‌گه‌ڵ هێزه‌كانى ئه‌حمه‌د شه‌رع بكه‌ن به‌هۆى مه‌ترسییه‌كانى دزه‌كردنى زانیارییه‌كان بۆ گروپه‌ تیرۆریستیه‌كانى سەربە داعش ‌و گروپە جیهادى‌و توندڕه‌وه‌كانى دیكه‌.

ئه‌مریكا ڕایگه‌یاندبوو، ته‌نها ده‌توانن مامه‌ڵه‌ له‌گه‌ڵ هێزه‌كانى سوریاى دیموكرات "هه‌سه‌ده‌" بكه‌ن وه‌كو هێزێكى شاره‌زاو لێهاتوو بۆ ڕووبه‌ڕووبونه‌وه‌ى تیرۆر له‌سوریاو ناوچه‌كه‌دا.

به‌گوێره‌ى چه‌ند سه‌رچاوه‌یه‌كى ئاگادار، لەمدواییانە کۆبوونەوەیەکی گرنگ لەنێوان شاندی هەواڵگری فەرەنساو تورکیا لەئەمریکا ئەنجامدراوە.

لەگفتوگۆکەدا تیشکخراوه‌ته‌سه‌ر مەلەفی سوریا بەگشتی‌و پرسی کورد بەتایبەتی.

بەگوێرەی سەرچاوه‌كان، شاندی فەرەنسا، تورکیای ئاگادارکردووەتەوە، نابێت هیچ ده‌ستوه‌ردانێك له‌كاروباى ناوخۆى سوریا ئه‌نجامبدات به‌تایبه‌ت ڕۆژئاواى كوردستان.

شاندی هەواڵگریی فەڕەنسا به‌توركه‌كانیان وتووه‌، پێویسته‌ په‌له‌بكه‌ن له‌دۆزینەوەی چارەسەری ئاشتیانە بۆ پرسی کورد.

فه‌ره‌نسیه‌كان جه‌ختیانكردووه‌ته‌وه‌، سیاسەتی ناوخۆی تورکیا کاتێک بەهێزتر دەبێت کە کورد بتوانێت مافەکانی بەدەستبهێنێت‌و هه‌ست به‌پارێزراوى بكات،فەەنسییەکان بە تورکەکانیان ووتووە ئاسایش و پێدانی مافەکانی کورد لە کۆتاییدا سەقامگیری بۆ تورکیا و ئابورییەکەی بەدیدێنێت.

شانده‌ هه‌واڵگرییه‌كه‌ى فه‌ره‌نسا بەپشتبەستن بەچاودێریکردنی دۆخی سوریا، بۆیان دەرکەوتووە کە دانیشتوانی باکور و ڕۆژهەڵاتی سوریا کەمەبەست لێی ڕۆژئاوای کوردستانە، پێیانوایە، خۆبەڕێوەبردن تاکەڕێگه‌یه‌ بۆ چارەسەرێکی سیاسی کە مافەکانی هەموو لایەنەکان دەستەبەربکات، ئەوەش  لەسەر بنەمای سیستمێکی لامەرکەزیی بۆ سوریا.