كۆمسیۆن له‌باره‌ى بانگه‌شه‌ى هه‌ڵبژاردن له‌هه‌رێم زانیاریى ئاشكراده‌كات

لەماوەی بانگەشەی هەڵبژاردن بۆ پەرلەمانی عێراق تائێستا هیچ پێشلکارییەک لەهەرێمی کوردستان تۆمارنەکراوە لەلایەن کۆمیسیۆنی هەڵبژاردنەکانی عێراقەوە.

ڕۆژی 3ى ئه‌م مانگه‌ بانگەشە بۆ هەڵبژاردنی پەرلەمانی عێراق دەستیپێکردو تا 8ى مانگى داهاتوو به‌رده‌وامده‌بێت، کۆمسیۆن ڕێنمایی‌و شێوازی بانگەشەی دیاریکردووە، لەهەر بازنەیەکی هەڵبژاردنیش لەچوارچێوەی ڕێنماییەکانی کۆمسیۆن ڕێنمایی تایبەت‌و ڕێکاری پێویستە دەگرنەبەر.

نەبەرد عومەر بەرپرسی دەستەی هەڵبژاردنەکانی کوردستان ڕایگەیاند، بەشێوەیەکی گشتیی لەسەرەتای پڕۆسەی بانگەشەی هەڵبژاردنەوە چەند کاندیدو لایەنێک لەخواروو و ناوەڕاستی عێراق پێشلکارییان ئەنجامداوەو تەنانەت کاندیدیش هەبووە دوورخراوەتەوە. 

وتیشى، "پڕۆسەکە لەهەرێمی کوردستان بەشێوەیەکی زۆرباش بەڕێوەدەچێت، تائێستا هیچ پێشێلکارییەک تۆمارنەکراوە". 

ئه‌وه‌شى ڕوونكرده‌وه‌، "داوامان لەلایەن سیاسییەکان‌و کاندیدان کردووە موڵک‌و ماڵی دەوڵەت بەکارنەهێنن بۆ بانگەشەی هەڵبژاردن‌و نابێت کاندیدان قسەی نەشیاو بەیەکتری بڵێن".

بەرپرسی دەستەی هەڵبژاردنەکانی کوردستان باسی لەوەکرد، بۆ بانگەشەی ئەمجارە لایەنە سیاسییەکان بەچڕی کار لەسەر سۆشیاڵ میدیا دەکەن، هەر بۆیە لیژنەیەکی تایبەتمان پێکهێناوە بۆ چاودێرکردنی سۆشیاڵ میدیا تاوەکو ئەوکەسانەی سەرپێچی دەکەن ڕووبەڕووی سزای یاساییان بکەینەوە.