عێراق ده‌بێته‌ خاوه‌نى سیستمه‌ پێشكه‌وتوه‌كه‌

فەرماندەی گشتیی بەرگریی ئاسمانی عێراق ئاشكرایدەكات، سیستەمێكی پێشكەوتووی بەرگریی ئاسمانی جێگیر دەكەن، سیستەمەكە لەوڵاتی كۆریای باشوور كڕاوە.

فەریق ڕوكن موهەنەد غالب ئەسەدی فەرماندەی گشتیی بەرگریی ئاسمانی عێراق ڕایگەیاندووە، لەچارێكی یەكەمی ساڵی داهاتوو (2026) ئەو سیستەمە بەرگرییەی داوامانكردبوو دەگات، سیستەمەكە یەكێكە لەنوێترین سیستەمەكانی بەرگریی ئاسمانی لەجیهاندا.

ڕاشیگەیاندووە، بەجێگیركردنی ئەو سیستەمە بەرگرییە، دەتوانین تاڕادەیەكی باش ئەركەكانمان بەشێوەیەكی سەركەوتوو ئەنجامبدەین‌و ئاسمانی عێراق لەهەر بەزاندنێك بپارێزین.

فەرماندەی گشتیی بەرگریی ئاسمانی عێراق ئاماژەی بەوەشداوە، سیستەمە بەرگرییە نوێیەكە دەتوانێت ڕووبەڕووی سەرجەم هێرش‌و مەترسییەكان ببێتەوە جا لەڕێگەی فڕۆكە یاخود درۆن یان مووشەكەوە ئەنجامبدرێت.

فەریق ڕوكن موهەنەد غالب ئەسەدی جەختیشیكردووه‌تەوە، سیستەمە بەرگرییەكە دەتوانێت لەژێر پاڵەپەستۆی جەنگی ئەلیكترۆنی زۆر بەهێزیشدا بەباشی كارەكانی خۆی ئەنجامبدات.

عێراق ساڵی ڕابردوو گرێبەستی لەگەڵ كۆریای باشوور ئیمزاكرد بەمەبەستی هێنانی چەند سیستەمێكی بەرگریی ئاسمانی پێشكەوتوو لەجۆری (M-SAM)، بڕیارە سیستەمەكە لەماوەی چەند ساڵێكدا بگەنه‌ عێراق.