سبه‌ینێ بڕیار له‌مووچه‌ ده‌درێت

سبەی سێشەممە وادەی بەڕێوەچوونی كۆبوونەوەی ئەنجوومەنی وەزیرانی عێراقە، چاوەڕواندەكرێت لەكۆبوونەوەكەدا تاووتوێی بابەتی ناردنی مووچەی مانگەكانی 8و 9ی مووچەخۆرانی هەرێمی كوردستان بكرێت.

به‌پێى زانیارییه‌كان، سبەینێ كۆبوونەوەی ئەنجوومەنی وەزیرانی عێراق بەڕێوەدەچێت، هەرچەندە لەكارنامەی كۆبوونەوەكەدا بابەتی مووچەی مووچەخۆرانی هەرێم تێدانییە، بەڵام زانراوە كە لەپاشكۆی كۆبوونەوەكە باس لەم بابەتە گرنگە دەكرێت.

له‌زانیارییەكاندا ئاماژه‌ به‌وه‌شكراوه‌، لەكۆبوونەوەی سبەی سێشەممەدا، وەزیرە كوردەكان پێشنیازدەكەن لەپاشكۆی كۆبوونەوەكە پرسی مووچەی مانگەكانی 8و 9ی مووچەخۆرانی هەرێمی كوردستان زیادبكرێت.

دوای هەناردەكردنەوەی نەوتی هەرێم بۆ دەرەوەو ڕێككەوتن لەسەر داهاتە نانەوتییەكان، هیچ بیانوویەك لەبەردەم حكوومەتی عێراق نەماوەتەوە بۆ نەناردنی مووچە، بۆیە پێشبینیدەكرێت لەكۆبوونەوەی سبەینێ ئەنجوومەنی وەزیران، محەمەد شیاع سوودانی سەرۆك وەزیرانی عێراق بڕیار لەسەر ناردنی مووچە بدات.

زانراوە لەكۆبوونەوەی سبەینێ ئەنجوومەنی وەزیران سەرەتا بڕیار لەسەر ناردنی مووچەی مانگی 8 دەدرێت، دوای تێپەڕبوونی ماوەیەك بەهەمانشێوە بڕیار لەسەر ناردنی مووچەی مانگی 9ش دەدرێت.

ئاماژە به‌وه‌شده‌كرێت، دەبێت پێش هاتنی سەری ساڵ‌و داخستنی بودجەی ساڵ، مووچەی فەرمانبەرانی هەرێمی كوردستان هاوتای مووچەی پارێزگاكانی عێراق بكرێت‌و دواكەوتنی تێدا نەمێنێت.