عێراق زیاتر لە 28 تۆن زێڕ هاوردە دەكات

ئەمڕۆ یەكشەممە، وەزارەتی پلاندانانى عێراق هاوردەکردنی زیاتر لە 28 تۆن زێڕى لە ماوەى ساڵانى 2023و 2024 لە ڕێگەی هەردو فڕۆکەخانەى بەغدا و نەجەفەوە، ڕاگەیاند.

فەیاز ئەلدولەیمی؛ سەرۆکی ڕێکخراوی ناوەندیى بۆ ستانداردکردن و کۆنتڕۆڵی جۆریی، لە ڕاگەیاندراوێکدا كە ئیرادە كۆپییەكى بەدەست گەیشتوە، ئاماژەى بەوەداوە، لەماوەى نێوان مانگى تشرینی یەکەمی 2023 تا کۆتایی کانونی یەکەمی 2024، حكومەتى عێراق 28 تۆن و 298 کیلۆگرام زێڕى لە ڕێگەی فڕۆکەخانەکانی بەغدا و نەجەفەوە هاوردە كردوە.

ئەلدولەیمی ڕونیشیکردەوە، لەماوەی سێ مانگی کۆتایی ساڵی 2023دا بڕى 4 تۆن هاوردەکراوە، لەکاتێکدا تەنها لەماوەی ساڵی 2024دا بڕی هاوردەکراو لە 24 تۆن تێپەڕیكردوە.

سەرۆکی ڕێکخراوی ناوەندیى بۆ ستانداردکردن و کۆنتڕۆڵی جۆریی ئەوەى خستەڕو كە بەشی زێڕینگەریی ڕێکخراوەکە، بەپێی بڕیارێکی ئەنجومەنی وەزیران و دوای کردنەوەی دو یەکەی پشکنین لە هەردو فڕۆكەخانەى ناوبراو، پشکنینیان بۆ سەرجەم بڕی زێڕى هاوردەکراو كردوەو دواتریش لێبڵى تایبەتیان لێداوەو دەركەوتوە زێڕەكان داهاتی دارایی زیاتر لە 5 ملیارو 536 ملیۆن دیناری عێراقییان بەدەستهێناوە.

هاوكات لە وتەكانى ناوبراودا جەخت لەوەکراوەتەوە کە رێکخراوی ناوەندیی بۆ ستانداردکردن و کۆنترۆڵى جۆریى؛ تاکە دەزگای فەرمییە کە دەسەڵاتی پشکنین و نیشانەکردنی زێڕینگەریی و پێدانی مۆڵەتی کارکردنی پیشەكە و تۆمارکردنی دەرچونی زێڕى لە عێراق هەبێت.

 ئەلدولەیمی ئەوەشى ئاشكراكردوە؛ لەماوەی ڕابردودا هیچ حاڵەتێکی دەرچونی زێڕ تۆمارنەکراوە.