زەوییەكانی نزیك یاریگەی نەورۆز دەكرێنە شوقەو ڤێلا

پاش ئەوەى لاهور شێخ جەنگى چەندینجار داواى ئەوەى كردبو زەوییەكانى نزیك لە یاریگەى یانەى نەورۆز لە سلێمانى بدرێت بە یانەكەو رەتیكردبۆوە بكرێت بە باڵەخانەو ڤێلا، لەئێستادا بڕیاروایە لە رێى وەبەرهێنەرێكەوە بكرێت بە شوققەو ڤێلاو پرۆژەى نیشتەجێبون.

بەپێى زانیارییەكانى ئیرادە، لە دواى روداوەكەى لالەزار، زەوییەكانی نزیك یاریگەی نەورۆز، ئامادەكراون بۆ فرۆشتن و بڕیاروایە بدرێت بە وەربەرهێنەرێكى دیارى شارەكە و ئەویش ڤێلاو باڵەخانەى تێدابكاتەوە، ئەگەرچى پێشتر لاهورى شێخ جەنگى هەڕەشەى لە بەرپرسان و وەبەرهێنەرانى سلێمانى كردبو كە ئەو كارە نەكەن.

هاوكات، دواى روداوەكەى لالەزار دەستگرتن بەسەر پرۆژەكانى لاهوردا دەستیپێكردوە؛ ئەگەرچى دەبو شوێنەكەو زەوییەكانى تەنیشت یانەكەش پرۆژەى حكومەت بونایە نەك بەرپرسان و تاكەكەسى دەستڕۆیشتوى ناو حزبەكان، كە بە جۆرێك لە جۆرەكان ئەو زەوییانە دەكەن بە موڵك و پرۆژەى خۆیان.

لەلایەكى ترەوە عەلى حەمەساڵح سەرۆكى رەوتى هەڵوێست؛ لە پەڕەى تایبەتى خۆى لە تۆڕى كۆمەڵایەتى فەیسبوك نوسیویەتى: دەیانەوێت دەوروبەری یاریگەی نەورۆز لە سلێمانی ببەن و بیفرۆشن، داویانە بە دو كۆمپانیا تا بیكەن بە ڤێلا، هاوكات ناوبراو پرسیارى ئەوەش دەكات ئەرێ ئەم زەویبردنە نەبڕایەوە؟.

وەك عەلى حەمە ساڵح لەو پۆستەى فەیسبوك دا ئاماژەى پێداوە بەهاى زەوییەكان بایى 100 ملیۆن دۆلارەو دواشى كردوە بكرێت بە شارێكى وەرزشى، نەك ڤێلاو باڵەخانە.

جێى ئاماژەیە، پێشتر وەزارەتی شارەوانی داوای لە بەرپرسانی شارەكە كردبو، نابێت هیچ پڕۆژەیەك لە نزیك یاریگەی نەورۆز دروستبكرێت، چونكە سەرجەم زەوییەكان موڵكی حكومەتن.

هەر بە گوێرەى زانیارییەكانى ئیرادە، یاریگەی نێودەوڵەتیی نەورۆز لە مانگى كانونی دوەمی 2021 و بە بڕى 12 ملیۆن دۆلار لەلایەن سەرۆكى بەرەى گەلەوە دەستكرا بە دروستكردنی، كە نزیكەى 15 هەزار تەماشاكەرى یارییەكان لەخۆدەگرێت و لە ئێستاشدا چونەژورەوە بۆ یاریگەكەش كراوە بە پارە.