سودانی داوا دەکات لێکۆڵینەوەی بەپەلە لە هێرشی درۆنییەکان بۆ سەرهەرێم بکرێت

ناوەندی هەواڵ

وتەبێژى فەرماندەى هێزە چەکدارەکانى عێراق، ڕایگەیاند، لە چەند ڕۆژى رابردوودا، ژمارەیەک کێڵگەى نەوت لە هەرێمى کوردستانى عێراق، بە درۆنى بۆمبڕێژکراو هێرشیان کرایە سەر، ئەوەش بە هەڕەشەى "راستەوخۆ" بۆ سەر بەرژەوەندییەکانى عێراقییەکان و دەستدرێژیکردنە سەر هەوڵەکانى دەوڵەت بۆ سەقامگیرى ناودەبات.

سەباح نوعمان،باسی لەوەشکردووە، سروشتى ئەو هێرشە تاوانکارییانە و کاتى ئەنجامدانى، ئاماژەیە بۆ بوونى نیازى "پیس" کە ئامانجى تێکەڵکردنى کارتى دۆسییەکان و زیان گەیاندنە بە عێراق و دامودەزگاکانى.

سەباح نوعمان، ئاماژەى بەوەشکردووە، محەمەد شیاع سودانى، فەرماندەى گشتى هێزە چەکدارەکان، سەرجەم لایەنە پەیوەندیدارەکانى راسپاردووە، لێکۆڵینەوەى بەپەلەو فراوان دەستپێبکەن بۆ دەستنیشانکردنى ئەو لایەنەى لە پشتى ئەو هێرشانەوەیە، لەگەڵ گرتنەبەرى رێوشوێنى تووند و پێویست و لێپرسینەوە لەوانەى تێوەگلاون بەبێ ئەوەى لە هیچ کەس سڵ بکەنەوە.

لە 24 کاتژمێری رابردوودا سێجار سنوورى پارێزگاكانى هەولێر، سلێمانى و دهۆک كەوتوونەتە بەرهێرشى درۆنى، ئەوەش کاردانەوەى ناوخۆیی و نێودەوڵەتى بەدوای خۆیدا هێناوە.