کۆنسوڵخانەی ئەمریکا بۆ عێراق: هێرشە درۆنییەکان قبوڵکراو نین

ناوەندی هەواڵ

کونسوڵخانەی ئەمریکا داوا لە حکومەتی عێراق دەکات ڕێگری لە هێرشە درۆنییەکانی میلیشیاکان بکات و ڕاشیدەگەیەنێت کە ئەو هێرشانە "قبوڵکراو نین".

ئەمڕۆ سێشەممە15ی تەمموزی 2025، کونسوڵخانەی ئەمریکا لە هەولێر لەڕاگەیەندراوێکدا دەڵێت" ویلایەتە یەکگرتوەکانی ئەمریکا سەرکۆنەی ئەو ھێرشە درۆنیانەی ئەم دواییە دەکات لە سەرانسەری عێراقدا، بە ھەردوو ھێرشی درۆنی 14 و 15 مانگی تەموزیشەوە بۆ سەر ژێرخانی گرنگی کێڵگە نەوتیەکانی خۆرمۆڵە و سەرسەنگ لە ھەرێمی کوردستانی عێراقدا.

کونسوڵخانەی ئەمریکا دەشڵێت: "پێویستە حکومەتی عێراق پیادەی دەسەڵاتی خۆی بکات بۆ ڕێگریکردن لە میلیشیا و گروپە چەکدارەکانی تر بۆ ئەنجامدانی ئەو ھێرشانە بۆسەر ئەو شوێنانە لە ناوخۆی وڵاتدا، بەو شوێنانەشەوە کە کۆمپانیا عێراقی و نێودەوڵەتیەکان وەبەرھێنانیان لە داھاتووی عێراقدا کردووە".

لە ڕاگەیەندراوەکەدا هاتووە کە "ئەو ھێرشانە قبوڵکراونین و ھەڕەشەن بۆسەر سەروەری عێراق و تەگەرە دەخەنە بەردەم ھەوڵەکانی عێراق بۆ سەرنج ڕاکێشانی وەبەرھێنانی دەرەکی".

کونسوڵخانەی ئەمریکا لەڕاگەیەندراوەکەیدا باسی لەوەشکردووە، کە ھانی حکومەتی عێراق دەدەین لێکۆڵینەوە بکات تا بزانێت کێ لە پەنای ھێرشەکانەوەیە و ڕووبەڕووی بەرپرسیارێتیان بکاتەوە".