ئەمڕۆ 15ساڵ بەسەر مەرگی هونەرمەند حمە جەزا تێدەپەڕێت

ناوەندی هەواڵ

 ئەمڕۆ ١٥ ساڵ تێپەڕ دەبێت بەسەر کۆچی دوایی هونەرمەندی شۆڕشگێڕ و نەتەوەیی حەمەجەزا، ئەو هونەرمەندەی بە هونەرەکەی ڕژێمی سەدامی هەراسان کردبوو.

هونەرمەندی کۆچکردوو گەجینەیەکی دەوڵەمەند بوو لە هونەر و شۆڕشگێڕی و بەدرێژایی  ٤١ ساڵی تەواو شۆڕش و كوردایەتی کرد بە ئاواز و مەقام و گۆرانی .

حمە جەزای هونەرمەند و کۆچکردوو، شیعری بەپێزی بۆ شاخ  و شەهید و گەریلا و و پێشمەرگە ئاوێتەی گەرووی كوردانەی خۆی كرد و دەیدا بە گوێی هەمواندا ، بەهۆی دەنگە تایبەت و كەسایەتییە بەهێزەكەیەوە ناو و ناوبانگی وەك هونەرمەند ی پێشمەرگە و نەتەوە بەهەموو لایەكدا بڵاوبوبویەوە .

حەمەجەزا ساڵی ١٩٤٩ لەشاری سلێمانی لەدایك بووە، لە بنەماڵەکەیاندا کەسانى دەنگخۆش و خاوەن دەنگی بە سۆز هەبوون، حەمەجەزاش یەکێک بوو لەو کەسە دەنگخۆشانە کە هەر لە منداڵییەوە ئەو بەهەرەیەی تێدا دەرکەوتبوو.
حاجی عەلی بەگ باوکی حەمەجەزا یەکێک بوو لە کەسایەتییە دیار و کاریگەرەکانى شاری سلێمانی و هەرێمی کوردستان .

لە تەمەنی ١٩ ساڵیدا حمە جەزای هونەرمەندی شاخ و شار، ژیانی هاوژیانی پێکهێناوە و باوکی شەش منداڵە و لە ساڵی ١٩٨١ بەهۆی فشارەکانى ڕژێمی بەعسی ئەو کاتەوە، ڕوو دەکاتە شاخ و دەبێتە پێشمەرگە.

هونەرمەند حمە جەزا ساڵی ١٩٦٩ بووەتە ئەندامی تیپی هونەر و وێژەی كوردی، هەر و لەو ساڵەدا لەگەڵ هونەرمەندان حەمەی نێرگز، عوسمان عەلی، سەڵاح مەجید بەشداری چەندین ئاهەنگی میوزیك و گۆرانی کردووە.

ساڵی ١٩٧١ حەمەجەزا لەگەڵ تیپی باواجی كۆیە گۆرانی “بیبی خانم”ـی تۆماركردووە، ساڵی ١٩٧٧ به‌رهه‌مێكی تری به‌ناوی “ئیشق و ئازادی” هۆنراوه‌ی “هێمن موكریانی” له‌گه‌ڵ “تیپی موزیكی هه‌ولێر” تۆمارکردووە، دواتر چوار گۆرانی تری له‌گه‌ڵ هه‌مان تیپدا بڵاوده‌كاته‌وه‌، له‌ساڵی ١٩٨٠ـدا دوو گۆرانی تر له‌گه‌ڵ “تیپی موزیكی هه‌ولێر” تۆمار کردووە.

سه‌ره‌ڕای سه‌ختی ژیانی شاخ و پێشمه‌رگایه‌تی بەڵام زیاتر تێکەڵ بە کاری هونەر دەبێت و دۆڵ و شاخ و گرد و گوندەکان پڕ دەکات لە چریکە و هاواری کوردانەی خۆی و سرووشت و پێشمەرگە تێکەڵی هونەرەکەی دەکات، لە ڕۆژگاری شاخ و پێشمەرگایەتیدا كۆمه‌ڵێك له ‌سروودی نیشتیمانی بۆ پێشمه‌رگه‌ و خه‌باتی ڕزگاریخوازی كوردستان تۆماركرد.

حمە جەزای هونەرمەند چۆن لە شاخ پێشمەرگەی خاک بوو، لە ئان و ساتی شەڕی براکوژیشدا وەک موڵکی باشور و هونەرمەندێکی نەتەوەیی مایەوە بە بێ جیاوازی، ئەوەش لە مردنەکەیدا زۆر بە ڕوونی ڕەنگیدایەوە .
لەسەردەمانی شاخ و شۆڕشدا، دەنگی حەمەجەزا سیمبولی بەرگریی و ڕووبەرووبوونەوە و ئیرادەی بەرزیی پێشمەرگە و حەڵکی باشوری کوردسدتان بوو، ئەو کاتێک گۆرانی “هۆ کاکی پێشمەرگە”ـی دەچڕی، ئیدی پێشمەرگەکان گیان لەسەر دەست، ڕووبەڕووی دوژمن دەبوونەوە .

گۆرانییەکانی حەمەجەزا چ لە شاخ و سەردەمی شۆڕشی چەکدار، چ لە دوای ئازاد کردنی باشوردا دەبووە بزوێنەری هەستێکی جیاواز و ورەیەکی بە تینی دەدا، بەشێوەیەک ئێستاشی لەگەڵدا بێ گۆرانیەکانی لەسەر ویرد و زمانی هاوڵاتیان و پێشمەرگەی نیشتیمانە .

حەمە جەزای هونەرمەند و نیستیمانی، ڕۆژگار بواری زیاتری نەدا، ئەو نەخۆشی بەرۆکی گرت و خستیە جێگا ، هێواش هێواش شێرپەنجە تەنگی پێهەڵچنی و جەستەی شەکەت کرد و لە ئێوارەی ١ـی تشرینی یەکەمی ٢٠١٠ دڵە گەورەکەی بۆ هەمیشە لە لێدان کەوت.