چەند بڕیارێک لە بەرژەوەندیی کەسوکاری شەهیدانی کەرکوک دەدرێت

ناوەندی هەواڵ

بۆ لەمەودوا کەسوکاری شەهیدان لە ناوچە دابڕێنراوەکان، هەمان ئیمتیازی هاوتاکانیان لە عێراق دەبێت بۆ کرێی خوێندن و کەمکردنەوەی پارەی خوێندن.

شاندێکی وەزارەتی کاروباری شەهیدانی عێراق و راوێژکارێکی سودانی بۆ کاروباری کەسوکاری شەهیدان، لەسەر داوای رێبوار تەها، پارێزگاری کەرکوک سەردانی کەرکوکیان کرد.

مەبەستی سەردانی ئەو شاندە بۆ ئەوە بووە، لەومەودوا کەسوکاری شەهیدان بەتایبەتی شەهیدانی "پێشمەرگە و ئەنفال" لە کەرکوک و ناوچە کێشە لەسەرەکان دەتوانن سوودمەندبن لەو ئیمتیازاتانەی لە ئەنجوومەنی نوێنەرانی عێراقەوە دەنگی لەسەردراوە بۆ کەسوکاری شەهیدان، لەکاتێکدا پێشتر بێبەشبوون لێی.

رێبوار تەها پارێزگاری کەرکوک لە کۆنگرەیەکی رۆژنامەوانیدا وتی، یەکێک لە ئیمتیازاتەکان، وەرگرتنی کەسوکاری شەهیدان دەبێت لە خوێندنی ماستەر و دکتۆرا و بەشداری ناکەن لە تاقیکردنەوەی رکابەری، جگەلەوەی 10٪ کورسییەکان بۆ ئەوان دەبێت و پێوەری تەمەنیش نایانگرێتەوە.

هەر بەگوێرەی ئیمتیازاتەکان، لە خوێندنی زانکۆ تایبەتەکان یاخود خوێندنی ئێوارانی زانکۆ، بڕی پارە بۆ کەسوکاری شەهیدان، بۆ 50٪ کەمدەکرێتەوە.